ಹೆಕ್ಕಿ ಹೆಕ್ಕಿ ಅಕ್ಕರ
ಸಾಲು ಸಾಲು ಬರೆದು
ತಿದ್ದಿ ತೀಡಿ ಶಬ್ದಗಳ
ಜೋಡಿಸಿದೊಡನೆ ಕವಿತೆಯಾಯಿತೆ?
ಒಳಗಣ ಹಸಿಬಿಸಿ ಭಾವ
ಅರೆಬೆಂದು ಅವಸರದಲಿ
ಎದೆಯ ಎಲ್ಲೆ ದಾಟಿ
ಹೊರಟ ನಿಟ್ಟುಸಿರಿನಿಂದೆಂಥ ಕವನ?
ಹೆಪ್ಪುಗಟ್ಟಿದ ಹಾಲು ಕೆನೆಮೊಸರು
ಮುಚ್ಚಟೆಯಿಂದ ಕಡೆದರೇ ತಾನೆ
ಬೆಣ್ಣೆ ತೇಲಿ ಬರುವದು ಮಜ್ಜಿಗೆಯಲಿ
ಹೆಪ್ಪುಗಟ್ಟದ ಹಾಲು ಕೊಟ್ಟೀತೆ ನವನೀತ?
ಕನಸುಗಳ ಬಿತ್ತಿ
ಪರಿಶ್ರಮದ ಪಾತಿ ಕಟ್ಟಿ
ವಿಧಿಕರಾರಿನ ಎಲ್ಲೆ ಪರಖಿ
ಬೆಳೆದ ಸಿಹಿಕಹಿಯ ಮೆದ್ದು
ಹುತ್ತಗಟ್ಟದ ಚಿತ್ತ ಕಟ್ಟೀತಾದರು ಏನ ?